Prezident İlham Əliyev Almaniyanın Federal Kansleri Fridrix Mertslə Berlində keçirdiyi birgə mətbuat konfransında Avropanın enerji təhlükəsizliyi, qaz infrastrukturunun genişləndirilməsi və maliyyələşdirmə məsələləri ilə bağlı mühüm açıqlamalar verib.

Realmedia.info xəbər verir ki, dövlət başçısı Avropada yeni interkonnektorların inşasının zəruri olduğunu bildirib.

Prezident qeyd edib ki, mövcud qaz infrastrukturunun genişləndirilməsi üçün ciddi maliyyə resurslarına ehtiyac var.

"Avropa məkanında yeni interkonnektorlar lazımdır. Əlbəttə ki, buna vəsait lazımdır", – deyə Prezident İlham Əliyev vurğulayıb.

Dövlət başçısı bildirib ki, əsas problemlərdən biri Avropa banklarının, xüsusilə də Avropa İnvestisiya Bankının yaşıl gündəlik siyasəti səbəbindən neft və qaz layihələrinin maliyyələşdirilməsini dayandırmasıdır.

Prezidentin sözlərinə görə, bu səbəbdən Avropaya qaz nəqlini təmin edən infrastrukturun genişləndirilməsi üçün alternativ maliyyə mənbələrinin axtarılması zərurəti yaranıb.

İlham Əliyev qeyd edib ki, Yaxın Şərqdə davam edən gərginlik, ənənəvi enerji təchizat zəncirlərinin pozulması və Rusiyanın neft məhsulları ixracında yaranan çətinliklər mövcud yanaşmaların yenidən nəzərdən keçirilməsini zəruri edir.

Dövlət başçısı hesab edir ki, yaşıl enerji siyasəti nəzərə alınmaqla Avropa maliyyə institutları neft-qaz layihələrinə münasibətlərini yenidən qiymətləndirməlidir.

Prezident vurğulayıb ki, belə bir qərar qəbul olunacağı təqdirdə Azərbaycanın Avropa ölkələrinə, o cümlədən Almaniyaya təbii qaz ixracını əhəmiyyətli dərəcədə artırmaq üçün kifayət qədər potensialı mövcuddur.

Onun sözlərinə görə, enerji təhlükəsizliyi sahəsində əməkdaşlığın genişləndirilməsi həm Azərbaycan, həm də Avropa üçün qarşılıqlı faydalı nəticələr verə bilər.