Fransa Prezidenti Emmanuel Macron iranlı həmkarı Məsud Pezeşkian ilə telefon danışığının detallarını açıqlayıb.
Realmedia.info xəbər verir ki, Makron bu barədə X sosial şəbəkə hesabında paylaşım edib.

Fransa prezidentinin sözlərinə görə, o, Pezeşkiana İranın region ölkələrinə qarşı həyata keçirdiyi “qəbuledilməz hücumları” dərhal dayandırmağa çağırıb. Makron bildirib ki, eskalasiya bütün regionu ağır nəticələrə gətirib çıxara biləcək xaosa sürükləyir və bundan həm İran, həm də region xalqları zərər görür.

O qeyd edib ki, yalnız yeni siyasi və təhlükəsizlik çərçivəsi regionda sabitlik və təhlükəsizliyi təmin edə bilər. Bu çərçivə İranın ballistik proqramından və regional sabitliyi pozan fəaliyyətlərdən irəli gələn təhdidləri aradan qaldırmalı, eyni zamanda Tehranın heç vaxt nüvə silahına sahib olmayacağına zəmanət verməlidir.

Telefon danışığı zamanı Makron regionda müharibənin dayandırılmasının və gərginliyin azaldılmasının vacibliyini də vurğulayıb. O, həmçinin Hörmüz boğazında vəziyyətin gərginləşməsindən və Hizbullah ilə İsrail arasında davam edən münaqişədən narahatlığını ifadə edib.

Məsud Pezeşkian isə öz növbəsində ABŞ və İsrailin “qanunsuz təcavüzü”nün miqyası barədə məlumat verib. O bildirib ki, İran xalqı və hökuməti gərginlik istəməsə də, ölkənin ərazi bütövlüyü və milli təhlükəsizliyini qorumaq üçün müqavimət göstərməkdə qərarlıdır.

Xatırladaq ki, ABŞ və İsrail fevralın 28-də İrana qarşı hərbi əməliyyata başlayaraq ölkənin müxtəlif şəhərlərinə hava zərbələri endirib. İran isə cavab olaraq İsrail ərazisinə raket zərbələri endirib və ABŞ-nin Fars körfəzi ölkələrində yerləşən hərbi bazalarına hücumlar həyata keçirib.

Yaxın Şərqdə yaranmış gərgin vəziyyət səbəbindən regionun bəzi ölkələri hava məkanını müvəqqəti olaraq bağlayıb. Həmin gün İranın ali dini rəhbəri Əli Xamenei də ABŞ və İsrailin hücumları nəticəsində həlak olub.