ABŞ-da respublikaçı senator Tom Koton İran rəhbərliyinə yönəlik sərt açıqlama verib.

Realmedia.info xəbər verir ki, senator sosial şəbəkə platforması X-də paylaşımında ABŞ Prezidenti Donald Trampın İranla bağlı mövqeyinə toxunub. O bildirib ki, Tramp açıq şəkildə bəyan edib — İran rejimi heç vaxt nüvə silahına sahib ola bilməz.

Koton qeyd edib ki, İran rəhbərliyi ABŞ-ın hərbi gücündən xəbərdardır və ən doğru addım Prezident Trampın mesajlarını ciddi qəbul etməkdir. Senatorun sözlərinə görə, rəsmi Vaşinqton İranın nüvə silahı əldə etməsinin qarşısını almaqda qərarlıdır.

Son dövrlər ABŞ və İran arasında gərginlik yenidən artıb. ABŞ Prezidenti Donald Tramp İranı nüvə proqramı ilə bağlı razılaşmaya getməyə çağırıb və əks halda daha sərt addımların mümkün olacağını bildirib.

Eyni zamanda regionda hərbi-siyasi gərginliyin artması fonunda Tehran tərəfi də Vaşinqtonun mümkün hərbi addımlarına sərt cavab veriləcəyi barədə xəbərdarlıq edir.