Azərbaycanda istehlak və ipoteka kreditləri üzrə risklərin sığortalanması nəzərdə tutulur. Yeni mexanizmin tətbiqi kredit faizlərinin azalmasına və vətəndaşların daha etibarlı maliyyə müdafiəsinə şərait yarada bilər.

Realmedia.info xəbər verir ki, bu barədə "Xəzər" TV-yə açıqlamasında Milli Məclisin deputatı Vüqar Bayramov danışıb.

Deputat bildirib ki, Azərbaycan Mərkəzi Bankı kredit risklərinin sığortalanmasını nəzərdə tutan yeni qaydalar hazırlayıb və sənədin yaxın vaxtlarda təsdiqlənməsi gözlənilir.

Onun sözlərinə görə, yeni mexanizm vətəndaşların özlərindən asılı olmayan səbəblərdən kredit ödənişində çətinliklə üzləşdiyi hallarda mühüm rol oynayacaq.

"Bəzi hallarda vətəndaşlar kredit götürür, lakin sonradan iş yerinin bağlanması, işdən azad olunması və ya digər onlardan asılı olmayan səbəblər nəticəsində kredit ödənişini həyata keçirməkdə çətinlik çəkirlər. Kredit riskinin sığortalanması belə hallarda öhdəliyin sığorta şirkəti tərəfindən qarşılanmasına imkan verəcək," – deyə Vüqar Bayramov qeyd edib.

Deputat vurğulayıb ki, kredit risklərinin sığortalanması həm vətəndaşların maliyyə yükünü azaltmağa, həm də bank sektorunda risklərin azalmasına xidmət edəcək. Bu isə kommersiya banklarının, xüsusilə ipoteka kreditləri üzrə daha aşağı faiz dərəcələri təklif etməsinə stimul yarada bilər.

Ekspertlərin fikrincə, yeni mexanizmin tətbiqi kredit bazarında risklərin daha səmərəli idarə olunmasına və maliyyə sisteminin dayanıqlığının güclənməsinə də müsbət təsir göstərəcək.