Realmedia.info xəbər verir ki, Milli Məclisin deputatı Vüqar Bayramov minimum əməkhaqqının artırılması ilə bağlı yeni mexanizmin detalları barədə açıqlama verib.

Deputat bildirib ki, son dövrlərdə vətəndaşlar arasında minimum əməkhaqqının nə zaman artırılacağı ilə bağlı suallar artıb.

Onun sözlərinə görə, Azərbaycan Respublikası Əmək Məcəlləsinə edilən dəyişikliklərə əsasən, minimum əməkhaqqı məbləğinə ildə ən azı bir dəfə baxılacaq.
Vüqar Bayramov qeyd edib ki, bu dəyişiklik minimum əməkhaqqının artırılmasının artıq dövri və qanunla tənzimlənən prosesə çevrilməsi deməkdir. Eyni zamanda, artımların vahid tarif cədvəli üzrə bütün pillələrə təsir göstərəcəyi bildirilir.

Məlumata görə, dövlət büdcəsindən maliyyələşən sahələrdə çalışan işçilərin aylıq tarif maaşları minimum əməkhaqqı artdıqdan sonra bir ay ərzində yeni məbləğə uyğunlaşdırılacaq.

Deputat əlavə edib ki, vahid tarif cədvəlində əməkhaqları 19 dərəcə üzrə müəyyən edilir və hazırda ən aşağı maaş 400 manat, ən yüksək isə 1150 manat təşkil edir.

Onun sözlərinə görə, minimum əməkhaqqının artırılması təxminən 700 min vətəndaşın maaş artımına səbəb ola bilər.

Qeyd edilib ki, dəyişikliklər 23 fevral 2026-cı ildə təsdiqləndikdən sonra minimum əməkhaqqına ən azı bir dəfə baxılması hüquqi öhdəlik kimi müəyyənləşib. Bu isə gələcək illərdə artımların daha mütəmadi xarakter alacağını göstərir.