Azərbaycanda işəgötürənlərin əmək münasibətləri sahəsində öhdəlikləri daha da dəqiqləşdirilir. Bununla bağlı dəyişikliklər Əmək Məcəlləsi və Gender (kişi və qadınların) bərabərliyinin təminatları haqqında qanun üzrə Milli Məclisin bugünkü iclasında müzakirəyə çıxarılıb.

Layihəyə əsasən, işəgötürənlər cinsindən asılı olmayaraq eyni və ya bərabərdəyərli işi yerinə yetirən işçilərə bərabər əməkhaqqı ödəməyə borcludur. Eyni zamanda, iş yerlərində bərabər iş şəraitinin yaradılması, eyni pozuntuya görə fərqli intizam tədbirlərinin tətbiq edilməməsi, eləcə də cinsi ayrı-seçkiliyin və seksual qısnamanın qarşısının alınması üçün zəruri tədbirlərin görülməsi tələb olunur.

Sənəddə qeyd edilir ki, işin “bərabərdəyərli” hesab olunması əmək şəraiti, əmək funksiyasının xarakteri və mövcud tarif-ixtisas göstəriciləri nəzərə alınmaqla müəyyən ediləcək.

Dəyişikliklər Beynəlxalq Əmək Təşkilatının 100 nömrəli Konvensiyası və Avropa Şurasının Avropa Sosial Xartiyasına uyğun olaraq hazırlanıb. Bildirilir ki, mövcud qanunvericilikdə bu prinsip yalnız “eyni və ya oxşar işlər” çərçivəsində tətbiq olunurdu və daha geniş anlayışı əhatə etmirdi.

Qanunvericiliyə edilən bu dəyişikliklər ölkədə əməkhaqqı sahəsində gender bərabərliyinin daha effektiv təmin olunmasına xidmət edir.

Layihə səsverməyə çıxarılaraq üçüncü oxunuşda qəbul edilib.