Milli Məclis Əmək Məcəlləsi və “Narkoloji xidmət və nəzarət haqqında” qanuna təklif edilən dəyişiklikləri üçüncü oxunuşda qəbul edib.

Realmedia.info xəbər verir ki, dəyişikliklər narkotik asılılığı olan şəxslərin müəyyən peşə və vəzifələrə işə qəbulunun qarşısının alınması məqsədilə işəgötürənlərin məsuliyyətinin artırılmasını nəzərdə tutur.

Qanunvericiliyə əsasən, müvafiq peşə və vəzifələrə qəbul zamanı namizədlər dövlət narkoloji tibb müəssisəsinin verdiyi tibbi müayinə arayışını təqdim etməlidirlər. Eyni zamanda, iş zamanı əsaslı şübhələr yarandıqda işəgötürənin hesabına işçilərin dövri və ya növbədənkənar icbari tibbi müayinədən keçirilməsi tənzimlənir.

Dəyişikliyə görə, Əmək Məcəlləsinin 74-cü maddəsində nəzərdə tutulan peşə və vəzifələr üzrə narkoloji xəstəlik aşkar edildikdə əmək müqaviləsinə tərəflərin iradəsindən asılı olmayaraq xitam verilməsi mümkün olacaq.

Qanun layihəsi Milli Məclisdə qəbul edilib və müvafiq dəyişikliklərin tətbiqi ilə bağlı hüquqi mexanizmlər gücləndirilir.