DOST mərkəzlərində təqdim olunan xidmətlərin sayı bu gündən etibarən artırılaraq 160-dan 162-yə çatdırılıb.

Bu barədə Əmək və Əhalinin Sosial Müdafiəsi Nazirliyi məlumat yayıb.
Məlumata görə, Prezident İlham Əliyevin 29 dekabr 2025-ci il tarixli Fərmanına əsasən, DOST mərkəzlərində göstərilən xidmətlərin siyahısına daha iki yeni xidmət əlavə olunub.
Belə ki, bundan sonra DOST mərkəzlərində:

• istehsalatda bədbəxt hadisələr və peşə xəstəlikləri nəticəsində peşə əmək qabiliyyətinin itirilməsi halları üzrə icbari sığorta ödənişlərinin təyin edilməsi,

• həmin hallar üzrə icbari sığorta arayışlarının verilməsi xidmətləri də göstəriləcək.

Qeyd edilib ki, Fərman 2026-cı il yanvarın 1-dən qüvvəyə minib və hər iki xidmət bu gündən etibarən DOST mərkəzləri tərəfindən vətəndaşlara təqdim olunur.

Xatırladaq ki, qanunvericiliyə edilmiş son dəyişikliklərə əsasən, dövlət sektoru üzrə işçilərin istehsalat qəzaları və peşə xəstəlikləri nəticəsində peşə əmək qabiliyyətinin itirilməsi halları üzrə icbari sığorta və sığorta ödənişləri 2026-cı il yanvarın 1-dən Dövlət Sosial Müdafiə Fondu vasitəsilə həyata keçirilir. DOST mərkəzlərində xidmət siyahısına əlavə olunan yeni xidmətlər də məhz bu dəyişikliklərlə əlaqədardır.
Realmedia.az