Son günlər icra hakimiyyəti orqanlarında baş verən kadr dəyişiklikləri ictimaiyyətin diqqət mərkəzindədir. Xüsusilə Nəsimi rayonuna yeni təyin olunan icra başçısının 45 gün sonra vəzifəsindən azad olunması və bu müddət ərzində uzun illər çalışmış əməkdaşların işdən kənarlaşdırılması geniş müzakirələrə səbəb olub.
Milli Məclisin IV və V çağırış deputatı, hüquq üzrə fəlsəfə doktoru, hüquq müdafiəçisi Çingiz Qənizadə Demokrat.az-a açıqlamasında bildirib ki, bu məsələlər Azərbaycan cəmiyyətində aktualdır:
"Nəsimi rayonunun icra başçısı təyin olunandan 45 gün sonra vəzifəsindən uzaqlaşdırıldı. Əldə olunan məlumatlara görə müəyyən neqativ hallar mövcud olub. Hüquqi tərəfləri isə hüquq-mühafizə orqanları və Prezident Administrasiyası daha yaxşı bilir", – deyə sabiq deputat vurğulayıb.
Çingiz Qənizadə həmçinin qeyd edib ki, yeni rəhbər ilk günlərdə 6 əməkdaşı vəzifəsindən azad edib: "Onlardan biri icra hakimiyyətinin müavini olub. İki şöbə müdiri vəzifəsindən azad edilib, daha üç əməkdaş isə müxtəlif əsaslarla işdən çıxarılıb. Bu hallar uzun illər dövlət qulluğunda çalışmış şəxslərin hüquqlarının pozulmasına səbəb olur".
Hüquq müdafiəçisi bildirib ki, Prezident Administrasiyası Nəsimi Rayon İcra Hakimiyyətində baş verən prosesləri diqqətdə saxlayır və ümidvar olduğunu bildirib ki, zorla işdən çıxarılmış həmin 6 əməkdaş yenidən vəzifələrinə bərpa olunacaq: "İcra başçısının vəzifədən azad olunması ədalətin yalnız 50 faizinin bərpasıdır. Zorla işdən kənarlaşdırılmış şəxslərin yenidən işlərinə bərpası baş verən qanunsuzluqların tam aradan qaldırılması deməkdir".