İyunun 27-də Bakıdakı Milli Gimnastika Arenasında keçiriləcək “UFC Fight Night Baku” turnirinin əsas döyüşünün iştirakçısı Rafael Fiziyev artıq Azərbaycandadır.

Realmedia.info xəbər verir ki, UFC-nin azərbaycanlı ulduzunu Heydər Əliyev Beynəlxalq Aeroportunda azarkeşləri və yaxınları qarşılayıblar.

Rafael Fiziyev Bakıya qayıtmağın onun üçün xüsusi hiss olduğunu bildirib. Döyüşə tam hazır olduğunu qeyd edən idmançı qarşıdakı qarşılaşmanın məsuliyyətini dərk etdiyini vurğulayıb.

“Yenidən Bakıya, doğma Azərbaycana qayıtmaq çox xoşdur. Qarşıda məni vacib və məsuliyyətli döyüş gözləyir. Özümü əla hiss edirəm, motivasiyam yüksəkdir və tam hazıram. Hazırda bütün diqqətim döyüşə yönəlib”, - deyə Fiziyev bildirib.

Azərbaycanlı döyüşçü rəqibi Manuel Torresin aqressiv üsluba malik olduğunu, lakin bunun onun hazırlığına təsir etmədiyini qeyd edib.

“Oktaqonda hər şey mümkündür. Bir zərbə, bir səhv bütün döyüşün taleyini dəyişə bilər. Mən uzun müddətdir bu döyüşə hazırlaşıram və indi bütün zəhmətin nəticəsini göstərmək vaxtıdır”, - Fiziyev açıqlamasında deyib.

O, azarkeşləri arenaya dəvət edərək Azərbaycanı layiqincə təmsil etmək üçün bütün gücünü ortaya qoyacağını bildirib.

Qeyd edək ki, “UFC Fight Night Baku” çərçivəsində Rafael Fiziyev və meksikalı Manuel Torres iyunun 27-də Milli Gimnastika Arenasında üz-üzə gələcəklər.