Ermənistan parlamentinin Xarici əlaqələr üzrə daimi komitəsinin sədri Sarqis Xandanyan ABŞ Konqresinin Xarici əlaqələr komitəsinin nümayəndəsi Lens Kokonos ilə görüş keçirib. Görüş zamanı “Beynəlxalq Sülh və Rifah naminə Tramp Marşrutu” (TRIPP) layihəsinin icra prosesi müzakirə olunub.

Realmedia xəbər verir ki, Oxu.Az-ın Ermənistan KİV-ə istinadən yaydığı məlumata görə, Ermənistan parlamentinin mətbuat xidməti tərəflərin layihənin reallaşdırılmasının vacibliyini vurğuladığını bildirib. Görüşdə həmçinin yaxın perspektivdə bu istiqamətdə görüləcək işlər və atılacaq praktiki addımlar ətrafında fikir mübadiləsi aparılıb.

Məlumata görə, tərəflər Ermənistan–Azərbaycan və Ermənistan–Türkiyə münasibətlərinin normallaşması prosesində baş verən son hadisələrə, eləcə də qarşılıqlı maraq doğuran regional məsələlərə xüsusi diqqət yetiriblər.

Xatırladaq ki, 2025-ci il avqustun 8-də Vaşinqtonda ABŞ Prezidenti Donald Trampın iştirakı ilə keçirilən üçtərəfli görüşdən sonra Azərbaycan Prezidenti İlham Əliyev və Ermənistanın baş naziri Nikol Paşinyan münasibətlərin sülh yolu ilə nizamlanması və Naxçıvanla Azərbaycanın digər hissələri arasında nəqliyyat əlaqələrinin yaradılması barədə birgə bəyannamə imzalayıblar. Sözügedən təşəbbüs “Beynəlxalq Sülh və Rifah naminə Tramp Marşrutu” (TRIPP) adlanır.