Yanvarın 15-də Pakistanın Baş naziri Məhəmməd Şahbaz Şərif hökumət üzvlərinin iştirakı ilə Azərbaycan Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin sədri Ülvi Mehdiyevin rəhbərlik etdiyi nümayəndə heyətini qəbul edib.
Görüş zamanı Azərbaycan ilə Pakistan arasında dostluq və strateji tərəfdaşlıq münasibətlərinin uğurla inkişaf etdiyi vurğulanıb. Tərəflər müxtəlif sahələrdə, xüsusilə də dövlət xidmətlərinin təşkili, rəqəmsal idarəetmə və sosial innovasiyalar istiqamətində əməkdaşlığın genişləndirilməsi imkanlarını müzakirə ediblər.
Baş nazir Məhəmməd Şahbaz Şərif Azərbaycanın “ASAN xidmət” modelinin beynəlxalq səviyyədə qazandığı nüfuzu yüksək qiymətləndirib və bu təcrübənin Pakistanda tətbiqinin əhəmiyyətini qeyd edib. Ülvi Mehdiyev isə Dövlət Agentliyinin fəaliyyəti, həyata keçirilən layihələr və əldə olunan nailiyyətlər barədə ətraflı məlumat verib.
Görüşdə qarşılıqlı maraq doğuran məsələlər ətrafında fikir mübadiləsi aparılıb, gələcək əməkdaşlıq perspektivləri nəzərdən keçirilib.