Azərbaycan və İran arasında gömrük sahəsində əməkdaşlığın inkişafı istiqamətində növbəti mühüm addım atılıb.

Realmedia.info xəbər verir ki, İran Gömrük İdarəsinin rəisi Forud Əsgəri və Azərbaycan Dövlət Gömrük Komitəsinin sədri Şahin Bağırov Biləsuvar sərhəd-keçid məntəqəsində görüş keçiriblər.

Görüş zamanı iki ölkə arasında gömrük əməkdaşlığının genişləndirilməsi, ticarət və tranzit daşımalarının inkişafı, həmçinin sərhəd-keçid prosedurlarının sadələşdirilməsi məsələləri müzakirə olunub. Tərəflər gömrük xidmətlərinin yeni fəaliyyət proqramları üzrə razılığa gəlib, görüşün yekununda isə gömrük əməkdaşlığına dair Anlaşma Memorandumu imzalayıblar.

Forud Əsgəri bildirib ki, Astara və Naxçıvan istiqamətlərində tikilən yeni körpülərin istifadəyə verilməsi nəqliyyat infrastrukturunu gücləndirəcək, yük avtomobillərinin sərhəddən keçidini asanlaşdıracaq və iki ölkə arasında ticarət dövriyyəsinin artmasına mühüm töhfə verəcək.

O, həmçinin İran prezidentinin Azərbaycanla iqtisadi və ticarət əlaqələrinin genişləndirilməsinə xüsusi önəm verdiyini, bu istiqamətdə müvafiq dövlət qurumlarına tapşırıqlar verildiyini qeyd edib.

Şahin Bağırov isə Azərbaycan və İran arasında ticarət münasibətlərinin strateji əhəmiyyət daşıdığını vurğulayaraq, qarşılıqlı əməkdaşlığın daha da genişləndirilməsi üçün hər iki tərəfin iradə nümayiş etdirdiyini bildirib.

Komitə sədri əlavə edib ki, belə görüşlər mövcud problemlərin operativ həllinə, sərhəd-keçid məntəqələrində yaranan maneələrin aradan qaldırılmasına və əməkdaşlığın daha səmərəli təşkilinə xidmət edir. O, bu məqsədlə İran Gömrük İdarəsinin rəhbəri ilə 24 saatlıq onlayn əlaqə mexanizminin yaradılması təklifini də müsbət qiymətləndirib.