İran hökuməti Azərbaycan-İran dövlət sərhədi vasitəsilə avtomobil idxalı imkanlarının genişləndirilməsi ilə bağlı yeni qərar qəbul edib.

Realmedia.info xəbər verir ki, məlumatı “Azad İran” “Telegram” kanalı yayıb.

Qərara əsasən, Ərdəbil Azad İqtisadi Zonasında yerləşən Biləsuvar (İran) gömrük məntəqəsinə idxal olunan avtomobillərin rəsmiləşdirilməsi üçün səlahiyyətli keçid məntəqəsi statusu verilib. Bununla da Azərbaycan-İran sərhədindən avtomobil idxalı üçün yeni marşrut istifadəyə açılıb.

Məlumata görə, qərar ölkədə avtomobil idxalına tətbiq olunan məhdudiyyətlərin mərhələli şəkildə yumşaldılması və xarici avtomobillərə artan tələbat fonunda qəbul olunub.

İran rəsmiləri bildiriblər ki, təşəbbüsün əsas məqsədi idxal prosedurlarını sürətləndirmək, digər gömrük keçid məntəqələrində yaranan yükü azaltmaq, həmçinin nəqliyyat və anbar xərclərini optimallaşdırmaqdır.

Qeyd edilir ki, yeni marşrutun istifadəyə verilməsi avtomobillərin gömrük rəsmiləşdirilməsini daha operativ həyata keçirməyə, anbar infrastrukturundan səmərəli istifadəyə və əməliyyat xərclərinin müəyyən hissəsinin azaldılmasına imkan yaradacaq.

Həmçinin vurğulanır ki, Biləsuvar gömrük məntəqəsi Qafqaz nəqliyyat dəhlizlərinə və Azərbaycan sərhədinə yaxın yerləşdiyi üçün İranın şimal-qərb bölgələrinin ticarətində strateji əhəmiyyət daşıyır.