Azərbaycan Prezidenti İlham Əliyev ölkədə dağ-mədən (metal filizləri) və metallurgiya sənayesinin inkişafının təmin edilməsi ilə bağlı mühüm Sərəncam imzalayıb.

Realmedia.info xəbər verir ki, sənədin əsas məqsədi bu sahənin xammaldan son məhsula qədər dəyər zənciri üzrə inkişafını sürətləndirmək, mineral resurslardan səmərəli istifadəni təmin etmək və yüksək əlavə dəyər yaradan metal emalını genişləndirməkdir. Eyni zamanda metallurgiya məhsullarının ixrac potensialının artırılması da prioritet istiqamətlərdən biri kimi müəyyən edilib.

Sərəncama əsasən, Nazirlər Kabineti dörd ay müddətində “2027–2030-cu illərdə dağ-mədən (metal filizləri) və metallurgiya sənayesinin inkişafına dair Dövlət Proqramı”nın layihəsini hazırlayıb Prezidentə təqdim etməlidir. Həmin proqram ölkənin sosial-iqtisadi inkişaf strategiyası ilə uzlaşdırılacaq və özəl sektorun layihələri də nəzərə alınacaq.

Sənəddə xüsusi olaraq Azəralüminium MMC-nin fəaliyyətinin genişləndirilməsi diqqət mərkəzində saxlanılır. Belə ki, elektroliz zavodunun tamamlanması və 2030-cu ilədək illik istehsal gücünün 100 min tona çatdırılması, eləcə də alüminium yayma məhsulları istehsalının 50 min tona qədər artırılması nəzərdə tutulur.

Bununla yanaşı, kalsinasiya və anodbişirmə zavodlarının tikintisi, layihələrin maliyyələşdirilməsi, enerji və nəqliyyat tariflərinin təkmilləşdirilməsi, eləcə də zəruri infrastrukturun yaradılması istiqamətində tapşırıqlar verilib.

Sərəncamda həmçinin Azərbaycan İnvestisiya Holdinqi tərəfindən hazırlanmış texniki-iqtisadi əsaslandırmaların nəzərə alınması, dövlət büdcəsi hesabına maliyyələşdirmə və digər təşkilati məsələlərin həlli də öz əksini tapıb.

Eyni zamanda, “Azərbaycan alüminiumu” Açıq Səhmdar Cəmiyyətinin aktivlərinin “Azəralüminium” MMC-nin balansına verilməsi, borcların tənzimlənməsi və vergi öhdəliklərinin həlli ilə bağlı tədbirlərin görülməsi tapşırılıb.

Qeyd edək ki, dağ-mədən və metallurgiya sənayesinin inkişafı ölkə iqtisadiyyatının şaxələndirilməsi, sənayeləşmənin dərinləşdirilməsi, ixracın genişləndirilməsi və regionların sosial-iqtisadi inkişafı baxımından strateji əhəmiyyət daşıyır.