“Azərbaycan alüminiumu” Açıq Səhmdar Cəmiyyəti ləğv ediləcək.

Realmedia.info xəbər verir ki, bu barədə Azərbaycan Prezidenti İlham Əliyevin imzaladığı dağ-mədən (metal filizləri) və metallurgiya sənayesinin inkişafı ilə bağlı Sərəncamda qeyd olunub.

Sərəncama əsasən, “Azərbaycan alüminiumu” ASC-nin aktivləri Azəralüminium MMC-nin balansına veriləcək. Bu addım sahədə idarəetmənin daha səmərəli təşkili və istehsal zəncirinin optimallaşdırılması məqsədi daşıyır.

Bununla yanaşı, Maliyyə Nazirliyinə cəmiyyətin qeyri-dövlət təşkilatları qarşısında təsdiq edilmiş borclarının qaytarılması üçün müvafiq tədbirlərin görülməsi tapşırılıb. Belə ki, təqdim edilən təsdiqedici sənədlər əsasında borclar bir ay müddətində dövlət büdcəsi və ya qanunvericilikdə nəzərdə tutulan digər maliyyə mənbələri hesabına ödənilməlidir.

Eyni zamanda, Azərbaycan İnvestisiya Holdinqinə Sərəncamdan irəli gələn məsələlərin həlli ilə bağlı zəruri tədbirlərin görülməsi tapşırılıb.

Qeyd edək ki, bu qərar ölkədə metallurgiya sahəsinin daha səmərəli idarə olunması, istehsal imkanlarının genişləndirilməsi və ixrac potensialının artırılması məqsədi daşıyır.