Azərbaycan Respublikasının Prezidenti İlham Əliyev iyulun 29-da Dünya Güləş Birliyinin prezidenti Nenad Laloviçi qəbul edib.

Realmedia.info xəbər verir ki, görüş zamanı dövlət başçısı ilə Nenad Laloviç arasında əvvəlki görüş məmnunluqla xatırlanıb.

Azərbaycan Prezidenti ilə görüşdən şərəf hissi duyduğunu bildirən Nenad Laloviç Bakıda 17 yaşadək güləşçilər arasında keçirilən dünya çempionatının yüksək səviyyədə təşkil olunduğunu qeyd edib.

Dünya Güləş Birliyinin prezidenti çempionatın yüksək səviyyədə keçirilməsinə, eləcə də Azərbaycanın ümumilikdə Dünya Güləş Birliyinin fəaliyyətinə göstərdiyi dəstəyə görə Prezident İlham Əliyevə minnətdarlığını ifadə edib.

Nenad Laloviç Azərbaycanda güləş idmanının inkişaf etdiyini vurğulayıb. O, ölkəmizdə güləş üzrə müxtəlif beynəlxalq səviyyəli yarışların təşkil edildiyini xatırladaraq, Azərbaycan Güləş Federasiyası ilə Dünya Güləş Birliyi arasında uğurlu əməkdaşlığın mövcud olduğunu bildirib.

Prezident İlham Əliyev isə 17 yaşadək güləşçilər arasında Bakıda keçirilən dünya çempionatının gənc idmançıların gələcəkdə yüksək nəticələr əldə etməsi baxımından mühüm əhəmiyyət daşıdığını qeyd edib.

Dövlət başçısı bundan sonra da Azərbaycanda beynəlxalq səviyyəli idman tədbirlərinin keçirilməsinin vacibliyini vurğulayıb.

Görüşdə Azərbaycan güləşçilərinin indiyədək beynəlxalq arenada mühüm qələbələr qazandıqları qeyd olunub. Həmçinin ölkəmizdə güləş idmanının zəngin ənənələrə malik olduğu, bu sahənin inkişafı istiqamətində dövlət səviyyəsində həyata keçirilən tədbirlər barədə fikir mübadiləsi aparılıb.

Görüş zamanı Azərbaycan ilə Dünya Güləş Birliyi arasında əməkdaşlığın perspektivləri və qarşılıqlı əlaqələrin daha da inkişaf etdirilməsi məsələləri ətrafında müzakirələr keçirilib.