Azərbaycan Respublikasının Prezidenti İlham Əliyev mayın 19-da Belarus Respublikası Milli Assambleyası Nümayəndələr Palatasının sədri İqor Sergeyenkonu qəbul edib.

Realmedia.info xəbər verir ki, görüş zamanı dövlət başçısı Belarusun Ümumdünya Şəhərsalma Forumunun 13-cü Sessiyasında (WUF13) yüksəksəviyyəli nümayəndə heyəti ilə iştirak etdiyini bildirib.

Prezident İlham Əliyev Azərbaycan ilə Belarus arasında dostluq münasibətlərinin uğurla inkişaf etdiyini vurğulayaraq, bütün sahələr üzrə fəal əməkdaşlığın həyata keçirildiyini qeyd edib. Dövlətimizin başçısı parlamentlərarası əlaqələrin münasibətlərin inkişafında mühüm rol oynadığını diqqətə çatdırıb.

Görüşdə iqtisadi əməkdaşlıq məsələlərinə də toxunulub. Prezident İlham Əliyev iki ölkə arasında birgə layihələrin uğurla icra olunduğunu bildirib.
Qəbula görə minnətdarlığını ifadə edən İqor Sergeyenko Belarus Prezidenti Aleksandr Lukaşenkonun salamlarını Azərbaycan Prezidentinə çatdırıb.

Prezident İlham Əliyev salamlara görə təşəkkürünü bildirərək, onun da salamlarını Aleksandr Lukaşenkoya çatdırmağı xahiş edib.



Belarus parlamentinin sədri qeyd edib ki, Azərbaycan və Belarus liderləri arasında şəxsi münasibətlər iki ölkənin müxtəlif qurumları arasında əməkdaşlığın genişlənməsinə mühüm töhfə verir.

İqor Sergeyenko WUF13 çərçivəsində keçirilən müzakirələrin şəhərsalma sahəsində mühüm istiqamətləri əhatə etdiyini bildirib və Azərbaycanın beynəlxalq tədbirlərin təşkilində zəngin təcrübəyə malik olduğunu vurğulayıb. O, forumun yüksək səviyyədə təşkil edildiyini xüsusi qeyd edib.

Görüş zamanı Azərbaycan-Belarus münasibətlərinin müxtəlif sahələrdə inkişaf perspektivləri, həmçinin qanunverici orqanlar arasında əməkdaşlığın genişləndirilməsi məsələləri ətrafında fikir mübadiləsi aparılıb.