ABŞ Prezidenti Donald Trampın Türkiyənin "F-35" proqramına qayıda biləcəyi ilə bağlı son açıqlamaları beynəlxalq gündəmdə geniş müzakirələrə səbəb olub. Lakin ekspertlər hesab edirlər ki, bu proses yalnız siyasi iradə ilə deyil, həm də hüquqi və geosiyasi amillərlə müəyyənləşəcək.

Realmedia.info xəbər verir ki, Kütahya Dumlupınar Universitetinin professoru, beynəlxalq münasibətlər üzrə ekspert Hüsamettin İnaç Oxu.Az-a açıqlamasında bildirib ki, Trampın Türkiyə ilə bağlı verdiyi mesajlar mühüm əhəmiyyət daşısa da, Ankaranın "F-35" proqramına qayıtması asan olmayacaq.

Onun sözlərinə görə, əsas maneələrdən biri Türkiyənin Rusiyadan aldığı "S-400" hava hücumundan müdafiə sistemləridir. ABŞ qanunvericiliyinə əsasən tətbiq edilən CAATSA sanksiyalarının ləğvi üçün "S-400" sistemlərinin taleyi ilə bağlı konkret addımlar atılmalıdır.

Ekspert qeyd edib ki, Türkiyənin qarşısında iki əsas variant var: ya "S-400" sistemləri üçüncü ölkəyə satılmalı, ya da ABŞ qanunvericiliyində dəyişiklik edilməlidir. Bununla yanaşı, ABŞ Konqresi, İsrailə yaxın siyasi dairələr, yunan və erməni lobbilərinin mövqeyi də qərarın qəbulunda mühüm rol oynayacaq.

Professorun fikrincə, Türkiyənin NATO daxilində artan strateji rolu və müdafiə sənayesində əldə etdiyi uğurlar Vaşinqtonun qərarına təsir edə bilər. O hesab edir ki, bütün çətinliklərə baxmayaraq, tərəflər müəyyən kompromis variantı üzərində razılığa gələ bilərlər. Bununla belə, Türkiyənin "F-35" proqramına qayıdışı yaxın perspektivdə mürəkkəb siyasi və hüquqi proses olaraq qalır.