İran son günlər həm diplomatik kanalları, həm də hökumətə yaxın media resursları vasitəsilə Cənubi Qafqazla bağlı diqqətçəkən mesajlar verməyə davam edir. Xüsusilə Azərbaycana münasibətdə sərgilənən mövqe Tehranın regiondakı yeni geosiyasi reallıqlarla barışmaqda çətinlik çəkdiyini bir daha nümayiş etdirir.

Realmedia.info xəbər verir ki, İranın Azərbaycandakı keçmiş səfiri, hazırda Prezident Administrasiyasının protokol və rəsmi tədbirlər üzrə müavini Seyid Abbas Musəvi növbəti açıqlamasında Cənubi Qafqazla bağlı fikirlər səsləndirib.

O bildirib ki, "Qafqaz bizim evimizdir və kənar qüvvələrin bölgəyə daxil olması sabitliyi poza bilər".

Lakin bu yanaşma bir sıra suallar doğurur. Belə ki, Azərbaycan torpaqları təxminən 30 il Ermənistanın işğalı altında qaldığı dövrdə İran tərəfindən oxşar sərt mövqe nümayiş etdirilməyib. Əksinə, həmin illərdə Tehranla İrəvan arasında iqtisadi və logistika əlaqələrinin davam etməsi Azərbaycanda dəfələrlə tənqid mövzusuna çevrilib.

Müşahidəçilərin fikrincə, İranın narahatlığının əsas səbəblərindən biri regionda formalaşan yeni nəqliyyat və iqtisadi layihələrdir. Xüsusilə Zəngəzur dəhlizi ilə bağlı müzakirələrin aktivləşməsi Tehranın bölgədəki ənənəvi təsir imkanlarının zəifləyə biləcəyi ilə bağlı narahatlıqları artırır.

Bununla yanaşı, İran mediasında Ermənistanla bağlı yayılan bəzi açıqlamalar da diqqət çəkir. Belə bəyanatlarda İrəvana yönələn xəbərdarlıq xarakterli mesajlar yer alır və Ermənistanın Tehranın regional siyasətini nəzərə almalı olduğu vurğulanır.

Ekspertlər hesab edirlər ki, burada maraqlı ziddiyyət ortaya çıxır. İran bir tərəfdən Qərb ölkələrinin regiondakı fəaliyyətini tənqid edir, digər tərəfdən isə Avropa İttifaqı missiyasının, ABŞ və Fransa ilə əməkdaşlığın genişləndirildiyi Ermənistanla sıx münasibətlərini davam etdirir.

Analitiklərə görə, İranın son dövrlərdə sərgilədiyi sərt ritorika daha çox daxili auditoriyaya hesablanıb. Yaxın Şərqdə yaşanan proseslər, iqtisadi çətinliklər və daxili problemlər fonunda regionla bağlı sərt açıqlamaların artması diqqəti daxili gündəmdən yayındırmaq cəhdi kimi də qiymətləndirilir.

Bütün bunların fonunda Azərbaycanın son illərdə regionun əsas siyasi və iqtisadi aktorlarından birinə çevrildiyi qeyd olunur. Ölkənin artan nüfuzu, strateji tərəfdaşlıqları və həyata keçirdiyi layihələr onu Cənubi Qafqazın əsas güc mərkəzlərindən birinə çevirib.

Mütəxəssislərin fikrincə, regionun gələcəyi hər hansı dövlətin tarixi ambisiyaları ilə deyil, ölkələrin suveren hüquqları və formalaşan yeni geosiyasi reallıqlar əsasında müəyyənləşəcək.