Ötən tədris ilində Azərbaycanda 200 tələbənin vəfat etdiyi məlum olub.

Realmedia.info xəbər verir ki, bu barədə Dövlət İmtahan Mərkəzinin (DİM) "Abituriyent" jurnalının 12-ci nömrəsində dərc olunan 2025/2026-cı tədris ili üçün tələbə qəbulu və ümumi təhsil müəssisələri üzrə buraxılış imtahanlarının nəticələrinə dair elmi-statistik materiallarda məlumat verilib.

Bildirilib ki, vəfat edən tələbələrdən 33 nəfəri bakalavriat, 5 nəfəri magistratura, 67 nəfəri tam orta ixtisas, 95 nəfəri isə orta ixtisas bazası üzrə təhsil alan şəxslər olub.

Hesabatda ali və orta ixtisas təhsili müəssisələrindən xaric edilən tələbələrin statistikası da açıqlanıb. Məlumata görə, 2025-ci ildə akademik borca görə 938 nəfər, digər təhsil müəssisəsinə köçürülmə ilə əlaqədar 926 nəfər universitetdən xaric edilib.

Bundan əlavə, təhsil haqqının ödənilməməsi, dərs buraxmaları və ya şəxsi istəkləri əsasında ümumilikdə 12 min 969 tələbənin təhsilinə xitam verilib.

Təhsil müəssisəsinin fəaliyyətinin dayandırılması səbəbindən xaric edilən tələbələrin sayı 115 nəfər olub.

Ötən il təkrar kursda saxlanılan tələbələrin sayı isə 114 nəfər təşkil edib.