Dövlət İmtahan Mərkəzi (DİM) I və IV ixtisas qrupları üzrə ali təhsil müəssisələrinə qəbul imtahanı keçirib. III ixtisas qrupu üzrə DT və TC altqruplarının hər ikisini seçən abituriyentlər üçün isə coğrafiya fənni üzrə imtahan da təşkil olunub.

DİM-dən verilən məlumata görə, imtahan Bakı, Xankəndi, Naxçıvan, Gəncə, Şəmkir, Ağstafa, Qazax, Sumqayıt, Abşeron, Şamaxı, Mingəçevir, Şəki, Zaqatala, Bərdə, Göyçay, Ucar, Kürdəmir, Şirvan, Sabirabad, Salyan, Lənkəran, Cəlilabad, Quba və Xaçmazda keçirilib.

Ümumilikdə imtahan üçün 212 imtahan binası və 3 803 imtahan zalı ayrılıb. Prosesin idarə olunmasına 212 ümumi imtahan rəhbəri, 605 imtahan rəhbəri, 4 716 nəzarətçi, 673 buraxılış rejimi əməkdaşı və 212 bina nümayəndəsi cəlb olunub.

İlkin məlumatlara əsasən, 10 nəfərdə mobil telefon aşkarlandığı üçün onlar imtahandan kənarlaşdırılıb. Bundan əlavə, bir nəzarətçi müəllimdə “ağıllı saat” aşkar edildiyi üçün o da imtahandan xaric edilib. Hazırda faktlarla bağlı araşdırma aparılır.

İmtahanda ümumilikdə 51 690 abituriyentin iştirakı nəzərdə tutulurdu. Onlardan 33 986 nəfəri I ixtisas qrupu, 6 518 nəfəri IV ixtisas qrupu üzrə, 11 186 nəfəri isə III qrupun DT və TC altqruplarını seçənlər üçün coğrafiya imtahanında iştirak edib.

İmtahan nəticələrinin yoxlanılması və emalına iyunun 8-dən başlanılacaq. Açıq tipli tapşırıqların yoxlanılması vaxt tələb etdiyindən nəticələrin təxminən iki həftə sonra elan olunması gözlənilir.

Bu gün saat 15:00-da DİM-in “YouTube” kanalı vasitəsilə canlı yayımda test tapşırıqlarının izahı veriləcək, düzgün cavablar açıqlanacaq. Abituriyentlər suallarını DİM-in “Facebook” səhifəsində yerləşdirilən link vasitəsilə ünvanlaya bilərlər.