Bu gün ölkənin müxtəlif şəhər və rayonlarında ümumi (9 illik) orta təhsil səviyyəsi üzrə buraxılış imtahanı təşkil olunur.

Realmedia.info xəbər verir ki, bu barədə Dövlət İmtahan Mərkəzi (DİM) məlumat yayıb.

Bildirilib ki, imtahanlar Bakı şəhərinin bir sıra rayonları ilə yanaşı, Gəncə (I hissə), həmçinin Samux, Yevlax, Şəmkir (I hissə), Ağstafa, Şəki, Lənkəran (I hissə), Astara, Yardımlı, Ağdam, Ağcabədi, Şuşa, Xankəndi, Kəlbəcər, Xocalı, Ucar, Zərdab, Şamaxı, İmişli, Hacıqabul, Biləsuvar, Qusar, Siyəzən, Xızı və Şabranda keçirilir.

İmtahan saat 11:00-da başlayır. Saat 10:45-də isə buraxılış rejimi başa çatır və bu vaxtdan sonra gələn iştirakçılar imtahan binalarına daxil ola bilməyəcəklər.

Qurum tərəfindən bildirilib ki, şagirdlərin rahat şəkildə imtahan binasına daxil olması üçün müxtəlif giriş saatları müəyyən edilib və bu məlumat buraxılış vərəqələrində qeyd olunub.

İmtahan zamanı mobil telefon, ağıllı saat, kalkulyator və digər elektron cihazların, eləcə də hər hansı köməkçi vəsaitlərin gətirilməsi və istifadəsi qadağandır.
İştirakçılar imtahana buraxılış vərəqəsi, şəxsiyyəti təsdiq edən sənəd və zəruri hallarda fotoşəkilli arayış təqdim etməlidirlər.

Məlumata əsasən, imtahanların təşkili üçün 207 bina və 3 664 zal ayrılıb. Prosesə yüzlərlə imtahan rəhbəri, minlərlə nəzarətçi və mühafizə əməkdaşı cəlb olunub.

Ümumilikdə imtahanda 49 701 şagirdin iştirakı gözlənilir. Sağlamlıq imkanları məhdud olan iştirakçılar üçün də xüsusi şərait yaradılıb.

Qeyd edək ki, imtahandan əvvəl təhlükəsizlik tədbirləri gücləndirilib və imtahan mərkəzləri mühafizəyə verilib.