Realmedia.info xəbər verir ki, bu barədə Dövlət İmtahan Mərkəzi məlumat yayıb.

Bildirilib ki, imtahan keçirilən şəhər və rayonlarda ümumilikdə 267 imtahan binası və 4645 imtahan zalı ayrılıb. İmtahanların idarə olunmasına 267 ümumi imtahan rəhbəri, 767 imtahan rəhbəri, 5776 nəzarətçi, 807 buraxılış rejimi əməkdaşı (mühafizə) və 267 bina nümayəndəsi cəlb olunub.

İmtahanda 67 nəfər sağlamlıq imkanları məhdud (gözdən əlil, serebral iflic, eşitmə əngəlli və digər) şagird də iştirak edib. Bu şagirdlərin rahat şəkildə imtahan verməsi üçün imtahan binalarında xüsusi zallar ayrılıb. Orqanizmin funksiyalarının 81–100 faiz pozulmasına görə gözdən əlilliyi müəyyən edilmiş şəxslərə isə fərdi nəzarətçilər təyin olunub. Hərəkət məhdudiyyətli şagirdlərin bina və zala daxil olması və hərəkəti üçün də xüsusi şərait yaradılıb.

Qeyd olunub ki, bu gün saat 15:30-da Dövlət İmtahan Mərkəzinin “YouTube” kanalı vasitəsilə canlı yayım keçiriləcək. Canlı yayım zamanı mərkəzin məsul əməkdaşları və ekspertlər imtahanda istifadə olunmuş test tapşırıqları ilə bağlı izahat verəcək, həmçinin qapalı və kodlaşdırıla bilən açıq tipli tapşırıqların düzgün cavabları təqdim olunacaq. Şagirdlər onları maraqlandıran sualları canlı yayımın şərh bölməsinə yaza bilərlər.

Martın 16-dan etibarən Dövlət İmtahan Mərkəzində imtahan protokolları və cavab vərəqlərinin emalına başlanılacaq.

İlkin məlumatlara əsasən, 4 nəfərdə mobil telefon aşkarlandığı üçün onlar imtahandan xaric edilib.
İmtahanda istifadə olunan yazılı cavab tələb edən açıq tipli tapşırıqların yoxlanılması vaxt tələb etdiyindən nəticələrin yaxın 7 həftə ərzində elan olunması nəzərdə tutulur.

İmtahanda iştirak edənlər, həmçinin valideynlər, müəllimlər və ekspertlər bütün test tapşırıqlarının izahının elektron versiyasını (PDF formasında), eləcə də etalon cavabları canlı yayımdan sonra Dövlət İmtahan Mərkəzinin sosial şəbəkə hesablarından əldə edə biləcəklər.