Dövlət İmtahan Mərkəzi (DİM) iyunun 7-də I və IV ixtisas qrupları üzrə ali təhsil müəssisələrinə qəbul imtahanının keçiriləcəyini açıqlayıb. Həmin gün III ixtisas qrupu üzrə DT və TC altqruplarının hər ikisini seçən abituriyentlər üçün coğrafiya fənni üzrə də imtahan təşkil olunacaq.

RealMedia.info xəbər verir ki, imtahanlar Bakı, Xankəndi, Naxçıvan, Gəncə, Şəmkir, Ağstafa, Qazax, Sumqayıt, Abşeron, Şamaxı, Mingəçevir, Şəki, Zaqatala, Bərdə, Göyçay, Ucar, Kürdəmir, Şirvan, Sabirabad, Salyan, Lənkəran, Cəlilabad, Quba və Xaçmaz şəhər və rayonlarında keçiriləcək.

Abituriyentlər mayın 26-dan etibarən DİM-in rəsmi internet səhifəsindən “İmtahana buraxılış vərəqəsi”ni çap edə bilirlər. Buraxılış vərəqəsində imtahanın keçiriləcəyi bina, zal, başlanma vaxtı və iştirakçının imtahan binasına gəlmə saatı göstərilib.

İmtahan saat 10:00-da başlayacaq. Saat 09:45-dən sonra imtahan binasına giriş dayandırılacaq və gecikən iştirakçılar binaya buraxılmayacaqlar.

DİM iştirakçılara imtahan binasına buraxılış vərəqəsində göstərilən vaxtda gəlməyi tövsiyə edir.

Abituriyentlər imtahana aşağıdakı sənədləri təqdim etməlidirlər:

İmtahana buraxılış vərəqəsi;

Şəxsiyyəti təsdiq edən sənədin əsli;

Şəxsiyyət vəsiqəsində şəkli olmayan iştirakçılar üçün təhsil müəssisəsi tərəfindən verilmiş, fotoşəkil yapışdırılmış və möhürlə təsdiqlənmiş arayış.

Məlumata görə, imtahanların keçirilməsi üçün ölkə üzrə 212 imtahan binası və 3 803 imtahan zalı ayrılıb. Prosesə 212 ümumi imtahan rəhbəri, 605 imtahan rəhbəri, 4 716 nəzarətçi, 673 buraxılış rejimi əməkdaşı və 212 bina nümayəndəsi cəlb olunub.

İmtahanlarda I ixtisas qrupu üzrə 33 986, IV ixtisas qrupu üzrə 6 518, III ixtisas qrupu üzrə coğrafiya fənni imtahanında isə 11 186 nəfər olmaqla ümumilikdə 51 690 abituriyentin iştirakı gözlənilir.

Bundan əlavə, 65 nəfər sağlamlıq imkanları məhdud abituriyent üçün xüsusi şərait yaradılıb. Onların rahat və maneəsiz şəkildə imtahan verməsi məqsədilə xüsusi zallar ayrılıb, ehtiyac olan hallarda fərdi nəzarətçilər təyin olunub.
DİM bildirir ki, imtahanların təhlükəsiz və şəffaf keçirilməsi üçün bütün hazırlıq işləri davam etdirilir. İyunun 6-da imtahan mərkəzlərinə yekun baxış keçiriləcək, binalar möhürlənərək mühafizəyə veriləcək.