Realmedia.info xəbər verir ki, Dövlət İmtahan Mərkəzi (DİM) tərəfindən təşkil olunan imtahanda 52 687 şagird iştirak edəcək.

İmtahanlar Bakı şəhərinin müxtəlif rayonları ilə yanaşı, ölkənin bir sıra şəhər və rayonlarında təşkil olunub. O cümlədən Sumqayıt, Gəncə, Mingəçevir, Qəbələ, Lənkəran və digər bölgələrdə şagirdlər biliklərini sınayacaqlar.

Bildirilib ki, imtahanda 34 nəfər sağlamlıq imkanları məhdud şagird də iştirak edir. Onların rahat şəkildə imtahan verməsi üçün xüsusi zallar ayrılıb, görmə qabiliyyəti məhdud olan iştirakçılar üçün fərdi nəzarətçilər təyin edilib, həmçinin hərəkət məhdudiyyətli şagirdlərin imtahan binalarına daxil olması üçün zəruri şərait yaradılıb.

Ümumilikdə imtahanların keçirilməsi üçün 216 bina və 3 837 zal ayrılıb. Prosesə 627 imtahan rəhbəri, 4 800 nəzarətçi, 701 mühafizə əməkdaşı və 216 bina nümayəndəsi cəlb olunub.

Qeyd edək ki, imtahan saat 11:00-da başlayır. Saat 10:45-dən sonra imtahan binalarına giriş dayandırılır və gecikən iştirakçılar buraxılmır.