İran vətəndaşı Şahram Mehdizadəhsaraj azərbaycanlı keçmiş həyat yoldaşı ilə bağlı ciddi iddialar səsləndirib.

Realmedia.info xəbər verir ki, Baku TV-nin qaynar xəttinə müraciət edən Ş.Mehdizadəhsaraj bildirib ki, dörd il əvvəl ailə qurduğu həyat yoldaşından ayrılıb və məhkəmənin qərarı ilə azyaşlı övladları analarının himayəsinə verilib.



Onun sözlərinə görə, həmin vaxtdan etibarən aliment ödəməsinə baxmayaraq, keçmiş həyat yoldaşının həyat tərzi uşaqların gələcəyi və təhlükəsizliyi üçün risk yaradır.

Şikayətçi qeyd edib ki, iki qızı və bir oğlu ilə bağlı narahatlıq keçirir. O iddia edir ki, uşaqları ona mesaj yazaraq ac və susuz qaldıqlarını bildiriblər. Həmçinin göndərdiyi aliment vəsaitinin düzgün xərclənmədiyini, hətta narkotik vasitələrə və digər məqsədlərə sərf olunduğunu düşünür.

Ş.Mehdizadəhsaraj məsələ ilə bağlı hüquq-mühafizə orqanlarına müraciət etdiyini və əlində müəyyən sübutların olduğunu bildirib. Onun sözlərinə görə, məhkəmə qərarı ilə keçmiş həyat yoldaşı 15 sutka inzibati həbs cəzası alıb.

Hazırda məsələ ilə bağlı məhkəmə araşdırması davam edir. Bildirilir ki, yekun qərar qəbul edilərkən azyaşlıların maraqları, yaşayış şəraiti və böyüdükləri mühit əsas meyar kimi nəzərə alınacaq.

Qeyd edək ki, səsləndirilən iddialar şikayətçi tərəfin mövqeyini əks etdirir və məhkəmənin yekun qərarı hələ açıqlanmayıb.