Əmək və Əhalinin Sosial Müdafiəsi Nazirliyinin tabeliyində fəaliyyət göstərən Sosial Xidmətlər Agentliyi tərəfindən ötən dövrdə 78 uşaq himayədar ailələrə verilib.

Realmedia.info xəbər verir ki, bu barədə məlumat nazirliyin mayın 31-i – Ümumdünya Himayədar Ailə Günü münasibətilə yaydığı paylaşımda əks olunub.

Bildirilib ki, Sosial Xidmətlər Agentliyi ilə uşaqları himayəyə götürən şəxslər arasında müvafiq müqavilələr imzalanıb. Himayədar ailələrə verilən uşaqlardan 34-ü oğlan, 44-ü isə qızdır.

Hazırda həmin uşaqlardan 41-i Bakıda, 4-ü Abşeron rayonunda, 33-ü isə ölkənin müxtəlif bölgələrində yaşayan ailələrdə böyüyür.

Nazirlik tərəfindən himayədar ailələrə aylıq sosial ödənişlər də həyata keçirilir. Belə ki, 6 yaşadək uşaqlara görə aylıq 355 manat, 7-13 yaş arası uşaqlara görə 375 manat, 14-18 yaş arası uşaqlara görə isə 395 manat müavinət ödənilir. Əlilliyi olan uşaqlar üçün bu məbləğlər yaş qruplarına uyğun olaraq 500, 600 və 650 manat təşkil edir.

Bununla yanaşı, himayədar ailələrə verilmiş uşaqların mövsümi geyimlə təmin olunması məqsədilə hər rübdə bir dəfə, hər uşaq üçün 200 manat məbləğində birdəfəlik müavinət də verilir.

Qeyd edək ki, hər il mayın 31-i Azərbaycanda da Ümumdünya Himayədar Ailə Günü kimi qeyd olunur. Bu günün əsas məqsədi valideyn himayəsindən məhrum olmuş uşaqların ailə mühitində böyüməsinə şərait yaradan himayədar ailələrin rolunu vurğulamaq və onların fəaliyyətinə diqqəti artırmaqdır.

Xatırladaq ki, Prezident İlham Əliyev tərəfindən 2023-cü il iyulun 12-də imzalanan qanunvericilik aktlarına əsasən, Azərbaycanda himayədar ailə institutu tətbiq olunmağa başlayıb. Bu model valideyn himayəsindən məhrum uşaqların dövlət nəzarəti altında ailə mühitində yaşamasını, inkişaf etməsini və qayğı ilə əhatə olunmasını təmin edir.