Heydər Əliyev Fondunun vitse-prezidenti, Leyla Əliyeva tərəfindən irəli sürülən təşəbbüs əsasında uşaq evi sosial xidmət müəssisələrində yaşayan uşaqlar üçün sosial-emosional öyrənmə proqramı icra olunur.

Proqram IDEA İctimai Birliyi, ADA Universiteti və Sosial Xidmətlər Agentliyi arasında qurulan əməkdaşlıq çərçivəsində həyata keçirilir. Layihənin əsas məqsədi sosial xidmət müəssisələrində böyüyən uşaqların sosial və emosional bacarıqlarının inkişafına dəstək verməkdir.

Ötən aydan start götürən proqram artıq uğurla davam etdirilir. Hazırda 1, 2 və 3 saylı uşaq evi sosial xidmət müəssisələrində həftəlik təlim sessiyaları təşkil olunur və bu məşğələlərə 100-dən çox uşaq cəlb edilib.

Təlimlər zamanı uşaqlara ünsiyyət bacarıqları, özünüifadə, emosiyaların idarə olunması, komanda işi və qarşılıqlı əməkdaşlıq kimi mühüm sosial vərdişlər öyrədilir. Bu fəaliyyətlər onların həm fərdi inkişafına, həm də sosial mühitə daha rahat inteqrasiyasına xidmət edir.

Proqramın icrası ADA Universitetinin tələbələri tərəfindən həyata keçirilir. Tədris prosesinin keyfiyyətli və səmərəli olması üçün universitetin müəllim heyəti də mütəmadi olaraq metodiki dəstək göstərir, sessiyaların məzmunu və yanaşmaları üzrə istiqamət verir.

Təşəbbüsün əsas hədəfi uşaq evlərində yaşayan uşaqların özünəinamının artırılması, emosional dayanıqlığının gücləndirilməsi və onların cəmiyyətə daha aktiv şəkildə inteqrasiya olunmasına şərait yaratmaqdır.