Bakı Media Mərkəzinin rəhbəri Arzu Əliyeva “Qaranlıqdan sonra” adlı xüsusi tədbirdə iştirak edib.

Tədbir “Azərbaycan Uşaqları” İctimai Birliyi tərəfindən təşkil olunub və Uşaq Sığınacağı – Reinteqrasiya Mərkəzində məskunlaşan uşaqların sosial inkişafına dəstək məqsədi daşıyıb.

Gecənin əsas məqsədi uşaqların yaradıcılıq bacarıqlarının inkişaf etdirilməsi, onların özünəinam hissinin gücləndirilməsi və cəmiyyətə reinteqrasiya prosesinə töhfə vermək olub.

Proqram çərçivəsində uşaqlar tərəfindən hazırlanan 21 əl işi nümayiş etdirilib. Bu əl işləri yararsız materiallardan hazırlanaraq onlara “ikinci həyat” verilməsi ideyasını əks etdirib. Bundan əlavə, uşaqlar Azərbaycan filmlərindən seçilmiş fraqmentləri səhnələşdirib və rəqs kompozisiyaları təqdim ediblər.

Tədbirdə tanınmış mədəniyyət xadimləri də iştirak edərək musiqi nömrələri ilə çıxış ediblər. Sonda “Azərbaycan Uşaqları” İctimai Birliyinin “Özgə uşağı olmur” himni səsləndirilib.

Arzu Əliyeva tədbirlə bağlı təəssüratlarını sosial şəbəkə hesabında da paylaşaraq bu cür təşəbbüslərin əhəmiyyətini vurğulayıb.