Avropa İttifaqı ABŞ və İran arasında hərbi əməliyyatların tamamilə dayandırılacağı halda belə, Tehrana qarşı tətbiq edilən sanksiyaların ləğvini planlaşdırmır.

Realmedia.info xəbər verir ki, bu barədə Avropa Komissiyasının rəhbəri Ursula fon der Lyayen Fransanın Evian şəhərində keçirilən Böyük Yeddilik (G7) sammiti öncəsi təşkil olunmuş mətbuat konfransında danışıb.

Onun sözlərinə görə, Avropa İttifaqının İrana qarşı tətbiq etdiyi sanksiyalar iki əsas səbəblə bağlıdır – insan hüquqlarının pozulması və kütləvi qırğın silahları ilə əlaqədar narahatlıqlar.

"Bizim İrana qarşı iki problemlə bağlı olan iki sanksiya mexanizmimiz var – bunlar insan hüquqlarının pozulması və kütləvi qırğın silahlarıdır. Bu problemlərin hər biri üzrə İranın davranışında real dəyişiklik görməliyik və yalnız bundan sonra sanksiyaların ləğvi məsələsi nəzərdən keçirilə bilər", – deyə Ursula fon der Lyayen bildirib.

Avropa Komissiyasının rəhbəri vurğulayıb ki, Avropa İttifaqı Tehranla münasibətlərdə prinsipial mövqeyini qoruyur və sanksiyaların ləğvi üçün konkret addımların atılmasını gözləyir.

Qeyd edək ki, G7 sammitində Yaxın Şərqdəki vəziyyət, İranın nüvə proqramı və regional təhlükəsizlik məsələləri əsas müzakirə mövzularından biridir.