ABŞ və İran arasında aparılan danışıqların uğursuzluqla nəticələnməsi bölgədə gərginliyi daha da artırıb. Mövcud vəziyyət fonunda İsrailin Tehrana qarşı hərbi əməliyyatları bərpa etməyə hazırlaşdığı bildirilir.

Realmedia.info xəbər verir ki, bu barədə “The Times of Israel” nəşri məlumat yayıb.

Məlumata görə, İsrailin güc strukturları tərəfindən ölkənin üç aparıcı telekanalına ötürülən koordinasiyalı informasiya sızması rəsmi Təl-Əvivin planlarını dolayısı ilə təsdiqləyir. “Channel 12” telekanalı mənbəyə istinad etmədən bildirib ki, İsrail Müdafiə Qüvvələri (SAXAL) təkcə İranla münaqişənin yenidən alovlanmasına deyil, eyni zamanda Tehrandan gözlənilə biləcək qəfil hücuma da hazırlaşır.

Digər tərəfdən, “Kan” teleradio şirkəti Müdafiə Nazirliyinin yüksəkvəzifəli rəsmisinə istinadən qeyd edib ki, əvvəlki qarşıdurma İranın nüvə proqramı və ballistik raket potensialına kifayət qədər təsir göstərmədən başa çatıb. Bu səbəbdən İsrailin hərbi əməliyyatları yenidən başlatmaqda maraqlı olduğu vurğulanır.

“Channel 13” telekanalının yaydığı məlumata əsasən isə İsrail Müdafiə Ordusunun Baş Qərargah rəisi, general-leytenant Eyal Zamir hərbi birliklərə döyüş əməliyyatlarının dərhal bərpasına hazır olmaq barədə göstəriş verib.

Qəzetin diqqət çəkdiyi məqamlardan biri də ABŞ Prezidenti Donald Trampın mümkün qərarından sonra İsrailin İranın energetika infrastrukturunu hədəfə alaraq Tehrana təzyiq göstərmək niyyətində olmasıdır. Məqsəd İranı nüvə proqramından imtina etməyə məcbur etmək kimi dəyərləndirilir.

Xatırladaq ki, aprelin 11-də İslamabadda ABŞ və İran arasında bir neçə mərhələdən ibarət danışıqlar keçirilib. İran nümayəndə heyətinə parlamentin spikeri Məhəmməd Baqir Qalibaf, ABŞ tərəfinə isə vitse-prezident Cey Di Vens rəhbərlik edib. Lakin tərəflər mövcud fikir ayrılıqları səbəbindən münaqişənin uzunmüddətli həlli ilə bağlı razılığa gələ bilməyiblər.

Danışıqların növbəti mərhələsinin nə vaxt keçiriləcəyi hələlik açıqlanmayıb.