Azərbaycanın Xalq artisti Flora Kərimova səhhətində yaranan narahatlıq səbəbindən xəstəxanaya yerləşdirilib.

Realmedia.info xəbər verir ki, sənətkarın müalicə prosesi Birinci vitse-prezident, Mehriban Əliyeva tərəfindən nəzarətə götürülüb.

Flora Kərimovanın köməkçisi Yaqut İmanovanın sözlərinə görə, xalq artisti artıq dörd gündür xəstəxanada müalicə alır və hazırda səhhəti qənaətbəxşdir.

Bildirilib ki, ötən gün Prezidentin köməkçisi, Heydər Əliyev Fondunun icraçı direktoru Anar Ələkbərov xəstəxanada Flora Kərimovanı ziyarət edib, həkimlərlə görüşərək müalicə prosesinin gedişi ilə maraqlanıb.

Yaqut İmanova qeyd edib ki, sənətkarın ürək və bel nahiyəsində problemləri olub. Onun sözlərinə görə, xəstəxanaya müraciət bir qədər geciksəydi, vəziyyət daha ciddi ola bilərdi.

Hazırda Flora Kərimovanın vəziyyəti həkim nəzarəti altında stabildir və sağlamlığının bərpası istiqamətində bütün zəruri tibbi tədbirlər həyata keçirilir. Xalq artistinin xəstəxanadan nə zaman buraxılacağı isə hələlik məlum deyil.