Bakı Dövlət Universitetinin professoru Hikmət Əlizadənin səhhətində ciddi problem yaranıb.

Məlumata görə, 70 yaşlı professor dünən iş yerində ürək nahiyəsində ağrı hiss etdikdən sonra təcili tibbi yardıma müraciət edib. Təcili yardım briqadası tərəfindən xəstəxanaya aparılarkən onun vəziyyəti ağırlaşıb — döş qəfəsində güclü ağrı, arterial təzyiqin enməsi və ürək döyüntülərinin sürətlənməsi qeydə alınıb.

Xəstə tibb müəssisəsinə çatdırılarkən ürəyi dayanıb və dərhal reanimasiya tədbirlərinə başlanılıb. Həkimlər tərəfindən 20–30 dəqiqə ərzində ürək masajı aparılıb, bu müddətdə professor kliniki ölüm vəziyyəti keçirib.

Daha sonra pasiyent təcili olaraq angioqrafiya otağına yerləşdirilib. Müayinələr zamanı ürək damarlarında ciddi tıxanma aşkar edilib və təcili müdaxilə icra olunub.

Əməliyyat Mərkəzi Gömrük Hospitalı-da invaziv kardiologiya şöbəsinin rəisi İlqar Tahiroğlu tərəfindən həyata keçirilib. Müdaxilə uğurla başa çatıb və ürək damarlarının keçiriciliyi bərpa olunub.

Məlumata görə, hazırda pasiyentin vəziyyəti stabildir, nə beynində, nə də ürəyində zədələnmə qeydə alınmayıb və onun yaxın günlərdə evə buraxılması planlaşdırılır.

Qeyd edək ki, Hikmət Əlizadə Elm və Təhsil Nazirliyi yanında İctimai Şuranın sədridir.