TƏBİB tibb bacılarının evlərə inyeksiya məqsədilə çağırılmaması ilə bağlı çağırış edib. Bununla belə, bəzi hallarda xəstəni vaxtında həkimə və ya təcili tibbi yardıma çatdırmaq mümkün olmur və tibb bacısının müdaxiləsinə ehtiyac yarana bilər. Belə bir vəziyyətdə baş verə biləcək ölüm halında məsuliyyətin kimə aid olması məsələsinə münasibət bildirilib.
Axar.az xəbər verir ki, TƏBİB-dən Mətbuat.az-a açıqlamada tibbi müdaxilələrin yalnız rəsmi səhiyyə müəssisələrində və ixtisaslı həkim göstərişi əsasında həyata keçirilməsinin tövsiyə olunduğu qeyd edilib. Bildirilib ki, bu yanaşma həm vətəndaşın, həm də tibb işçisinin təhlükəsizliyi və hüquqi məsuliyyət baxımından daha doğrudur.
Açıqlamada vurğulanıb ki, tibb bacısının əsas vəzifəsi həkim təyinatının icrasıdır. Xüsusilə inyeksiya və infuziya kimi tibbi müdaxilələr yalnız həkim göstərişi və tibbi nəzarət altında aparılmalıdır. Ev şəraitinin isə nə infrastruktur, nə də təhlükəsizlik baxımından tibbi müəssisəni əvəz edə bilmədiyi bildirilib.
Qeyd olunub ki, bu cür müdaxilələr zamanı ağırlaşma, o cümlədən anafilaktik şok riski mövcuddur və bu, pasiyentin həyatı üçün ciddi təhlükə yarada bilər. Nə beynəlxalq təcrübədə, nə də yerli normativlərdə tibb bacısının ev şəraitində müstəqil tibbi müdaxilə göstərməsi tövsiyə edilmir.
TƏBİB-dən bildirilib ki, əgər tibb bacısı ev şəraitində, həkim göstərişi və nəzarəti olmadan, qanuni əsaslar olmadan tibbi müdaxilə həyata keçirərsə və bu, mənfi nəticələnərsə, məsuliyyət həm onu çağıran vətəndaşa, həm də tibbi xidməti göstərən şəxsə aid edilə bilər. Hüquqi qiymət isə hər bir konkret hadisə üzrə hüquq-mühafizə orqanları tərəfindən araşdırmadan sonra verilir.