Azərbaycanın birinci xanımı Mehriban Əliyeva aprelin 6-da Tbilisi şəhərində yerləşən Mirzə Fətəli Axundzadə adına Azərbaycan Mədəniyyəti Muzeyi ilə tanış olub.

Realmedia.info xəbər verir ki, Azərbaycanın birinci xanımına muzey haqqında ətraflı məlumat verilib.

Bildirilib ki, muzeyin binası vaxtilə Mirzə Fətəli Axundzadənin vəsaiti hesabına inşa edilib. Gürcüstanda yaşayan azərbaycanlı ziyalıların müraciətinə əsasən, 1982-ci ildə burada yazıçının ev-muzeyi yaradılıb. 1996-cı ildə ümummilli lider Heydər Əliyevin Gürcüstana rəsmi səfərindən sonra bu mədəniyyət ocağı əsaslı şəkildə təmir edilərək mədəniyyət mərkəzi kimi fəaliyyətini davam etdirib.
Gürcüstan prezidentinin sərəncamına əsasən, 2007-ci ildə mərkəzə Azərbaycan Mədəniyyəti Muzeyi statusu verilib. 2013-cü ildə Azərbaycan Respublikasının maliyyə dəstəyi ilə burada əsaslı təmir və yenidənqurma işləri aparılıb. Elə həmin il mayın 8-də keçirilən açılış mərasimi Heydər Əliyevin 90 illik yubileyinə həsr olunub.

Hazırda muzeyin nəzdində fəaliyyət göstərən mədəniyyət mərkəzində xalçaçılıq, musiqi, o cümlədən Azərbaycan muğamı, rəsm və dil kursları təşkil olunur.

Muzeyin əsas məqsədi Azərbaycan xalqının zəngin mədəni irsini Gürcüstanda qoruyub saxlamaq və təbliğ etməkdir. Burada müxtəlif muzey fondlarından Azərbaycanın mədəniyyətinə aid eksponatlar toplanır, tədqiq edilir və sərgilənir.

Muzeydə milli musiqi alətləri, geyim nümunələri, xalq sənətinin müxtəlif sahələrinə aid eksponatlar, eləcə də Mirzə Fətəli Axundzadənin həyat və yaradıcılığını əks etdirən materiallar nümayiş etdirilir. Ümumilikdə 6 ekspozisiya zalı fəaliyyət göstərir.

Ekspozisiyada Gürcüstanda yaşayan azərbaycanlılar tərəfindən toxunmuş və yüzilliklərə gedib çıxan tarixə malik ənənəvi xalçalar da yer alır. Bu xalçaların toplanması və elmi şəkildə öyrənilməsi XIX əsrdən başlanıb.

Azərbaycan-Gürcüstan dostluğuna həsr olunmuş xüsusi zalda iki xalqın münasibətlərini əks etdirən sənət əsərləri və fotolar nümayiş olunur.

Muzeydə həmçinin mədəni tədbirlər, konfranslar keçirilir, Mirzə Şəfi Vazehin yaratdığı “Divani-Hikmət” ədəbi məclisinin ənənələrini davam etdirən “Müdriklər Məclisi” fəaliyyət göstərir. Burada Azərbaycan dilində kitabxana və incəsənət qalereyası da mövcuddur.

Səfərin sonunda Mehriban Əliyeva muzeyin xatirə kitabına ürək sözlərini yazıb. Uşaqlar tərəfindən toxunmuş kiçik xalçalar birinci xanıma hədiyyə olunub.