Azərbaycan tərəfindən Türkmənistana “Dostlug” adlı neftdaşıyan tanker hədiyyə olunub.

Realmedia.info xəbər verir ki, tanker Bakı Gəmiqayırma Zavodunda inşa edilib. Müasir standartlara uyğun hazırlanan gəminin ümumi uzunluğu 141 metr, eni 16,9 metr, suya oturumu isə 4,54 metr təşkil edir.

Məlumata görə, “Dostlug” tankerinin dedveyti 7 875 tondur. Gəmi Xəzər dənizində yükdaşımaların inkişafına və iki ölkə arasında əməkdaşlığın daha da möhkəmlənməsinə xidmət edəcək.

Qeyd edək ki, Bakı Gəmiqayırma Zavodunda indiyədək 14 gəminin inşası, eləcə də 170-dən çox gəminin təmiri ilə bağlı layihələr uğurla həyata keçirilib.

Hazırda zavodun sifariş portfelində 17 gəmi yer alır. Onlardan 11-nin inşası davam edir, 6 gəmi isə layihələndirmə mərhələsindədir.