Azov dənizində Palau bayrağı altında üzən gəmiyə pilotsuz uçuş aparatı ilə endirilən zərbə nəticəsində yaralanan Azərbaycan vətəndaşlarının sayı dördə çatıb.

Realmedia.info xəbər verir ki, hadisə zamanı xəsarət alan daha bir nəfər — gəminin bosmanı Rəşad Mədətxanov Yeysk Şəhər Mərkəzi Xəstəxanasının travmatologiya şöbəsinə yerləşdirilib.

Hazırda o, digər yaralılar Samid İbadzadə, Emin Valehov və Namiq Cəfərli ilə birlikdə eyni palatada müalicə alır.

Məlumata görə, yaralılar yenidən həkim müayinəsindən keçirilib. Emin Valehovun sağ qulağında problem yarandığı, Namiq Cəfərlinin hər iki qulağında eşitmə ilə bağlı narahatlığın olduğu bildirilib. Rəşad Mədətxanovun isə baş nahiyəsindən xəsarət aldığı qeyd olunub.

Hadisə ilə bağlı hüquq-mühafizə orqanlarının nümayəndələri yaralılarla görüşərək onların ifadələrini alıblar. Dindirilmə zamanı hücumun bəzi təfərrüatları da məlum olub.

Yaralıların sözlərinə görə, gəminin böyük mexaniki Qismət Əliyev pilotsuz uçuş aparatının zərbəsi nəticəsində ağır yanıq xəsarətləri alaraq həyatını itirib.

Bildirilib ki, gəminin kapitanı Fuad Orucov da hücum zamanı ağır yaralanıb. Onun ayağının sındığı, daha sonra xilasedici jilet geyindirilərək suya endirildiyi qeyd olunub. Yaralıların ifadələrinə əsasən, Fuad Orucov da hadisə nəticəsində həlak olub.

Faktla bağlı araşdırmalar davam etdirilir.