Türkiyə sahilləri yaxınlığında, Qara dənizdə Palau bayrağı altında üzən “Elbus” adlı neft tankerinə pilotsuz uçuş aparatı (PUA) ilə hücum edilib.

Məlumata görə, insident Türkiyənin Kastamonu vilayətinin İnebolu rayonu sahillərindən təxminən 30 dəniz mili aralıda baş verib. Hücum nəticəsində tanker zədələnib, lakin ekipaj üzvləri arasında xəsarət alan olmayıb.

Hadisədən sonra tanker Türkiyə Sahil Mühafizəsi tərəfindən nəzarətə götürülərək İnebolu limanına doğru yedəklənib. Gəminin boş olduğu və üzərində neft yükü daşımadığı bildirilir.

Bəzi beynəlxalq media qurumları “Elbus” tankerinin Rusiyanın sanksiyalardan yayınmaq üçün istifadə etdiyi “kölgə donanması” ilə əlaqəli ola biləcəyini iddia edir. Lakin bu məlumat rəsmi qurumlar tərəfindən hələlik təsdiqlənməyib.

PUA hücumunun kim tərəfindən həyata keçirildiyi və hücumun motivləri ilə bağlı rəsmi açıqlama verilməyib. Türkiyə tərəfi hadisə ilə bağlı araşdırma aparıldığını bildirib.

Qeyd edək ki, son dövrlər Qara dənizdə enerji daşımaları ilə bağlı gəmilərə qarşı təhlükəsizlik riskləri artmaqdadır.