Tədqiqatçılar 100 yaşdan yuxarı şəxslər üzərində apardıqları araşdırmalar zamanı qan qrupları ilə ömür uzunluğu arasında diqqətçəkən əlaqə aşkar ediblər.
Milli.Az xəbər verir ki, araşdırmalara əsasən, 0 (O) qan qrupu digər qan qrupları ilə müqayisədə daha uzunömürlülüklə əlaqələndirilir. Mütəxəssislər bildirirlər ki, qan qrupu uzun ömür üçün həlledici amil olmasa da, sağlam həyat tərzi ilə birlikdə bu faktorun müəyyən rolu ola bilər.
Elmi tədqiqatlar göstərir ki, 0 qan qrupuna malik şəxslər bir sıra xəstəliklərə qarşı daha davamlı olurlar. Qan qruplarının yüksək təzyiq, yoluxucu xəstəliklər və bəzi xərçəng növləri ilə əlaqəli olduğu, 0 qan qrupunun isə ümumilikdə daha sağlam hesab edildiyi bildirilir.
Böyük Britaniyada aparılan yeni araşdırmada London Universitetinə bağlı Royal Holloway Universitetinin alimləri qan qrupları ilə müxtəlif xəstəliklər arasında əlaqə müəyyən ediblər. Tədqiqat qan qrupunu təyin edən genlərin beyində qan laxtalanması riski (CVT) ilə əlaqəli ola biləcəyini ortaya qoyub.
882 nəfərin iştirak etdiyi araşdırmaya əsasən, AB qan qrupuna malik şəxslərdə CVT riski digər qruplarla müqayisədə orta hesabla 5,6 dəfə yüksək, 0 qan qrupunda isə bu riskin təxminən iki dəfə az olduğu müəyyən edilib.
Vorvik Universitetinin virusoloqu və molekulyar onkologiya professoru Lorens Yanq bildirib ki, qan qrupunu müəyyən edən molekullar qan laxtalanma mexanizminə birbaşa təsir göstərə bilər. Onun sözlərinə görə, hüceyrə membranındakı bəzi zülallar ürək-damar xəstəliklərinə qarşı həssaslığı artıra və ya azalda bilər.
Mütəxəssislər vurğulayırlar ki, 100 yaşına çatan insanların ortaq xüsusiyyətləri sırasında müntəzəm fiziki aktivlik, balanslı qidalanma, stressin düzgün idarə olunması, güclü sosial əlaqələr, həyata müsbət baxış və genetik faktorlar mühüm rol oynayır. Qan qrupu isə bu amillərdən yalnız biri hesab olunur.