Heydər Əliyev Fondunun vitse-prezidenti Leyla Əliyeva Efiopiyanın paytaxtı Əddis-Əbəbədə yerləşən Adva Zəfər Muzey Kompleksini ziyarət edib.
Adva Zəfər Muzeyi 1896-cı il martın 1-də Adva döyüşündə Efiopiya xalqının İtaliya işğalçıları üzərində qazandığı tarixi qələbəyə həsr olunmuş memorial kompleksdir. Muzey Afrika qitəsində müstəmləkəçiliyə qarşı mübarizənin və milli birliyin rəmzi kimi tanınır.
Qeyd edək ki, kompleks Əddis-Əbəbə şəhərinin mərkəzində, vaxtilə ölkənin müxtəlif bölgələrindən gələn efiopiyalıların Adva döyüşünə yollanmazdan əvvəl toplandıqları ərazidə inşa edilib. Muzeydə həmin dövrə aid tarixi eksponatlar, sənədlər və interaktiv sərgi bölmələri yer alır.
Ziyarət zamanı Leyla Əliyeva muzeyin ekspozisiyası ilə yaxından tanış olub, Efiopiya xalqının azadlıq mübarizəsini əks etdirən tarixi irsin qorunmasının əhəmiyyətini vurğulayıb.