Vatikan şəhər-dövlətinin qubernatorluğu ilə Heydər Əliyev Fondu arasında Müqəddəs Pavel Bazilikasında yeni bərpa işlərinə dair müqavilə imzalanıb.

Realmedia.info xəbər verir ki, sənəd Vatikanda keçirilən görüşdə Azərbaycan Respublikası Prezidentinin köməkçisi, Heydər Əliyev Fondunun icraçı direktoru Anar Ələkbərov və Vatikan şəhər-dövlətinin qubernatorluğunun prezidenti Raffaella Petrini tərəfindən imzalanıb.

Yeni layihə çərçivəsində Müqəddəs Pavel Bazilikasının daxilində yerləşən Müqəddəs Pavel və Müqəddəs Pyotr heykəllərinin, eləcə də həyət hissəsində Müqəddəs Pavel və Müqəddəs Luka heykəllərinin bərpası nəzərdə tutulur.

Görüş zamanı bazilika kompleksinə baxış keçirilib və əvvəlki mərhələlərdə Heydər Əliyev Fondu tərəfindən həyata keçirilən bərpa işləri barədə məlumat verilib.

Qeyd edilib ki, Müqəddəs Pavel Bazilikası Vatikanın ikinci ən böyük kilsəsi olmaqla, Roma şəhərinin dörd əsas papalıq bazilikalarından biridir. Tarixi və mədəni əhəmiyyətə malik olan bu dini abidə hər il minlərlə zəvvar və turist tərəfindən ziyarət olunur.

Bərpa işlərində müasir texnologiyaların, o cümlədən lazer təmizləmə və ekoloji təhlükəsiz konservasiya üsullarının tətbiqi planlaşdırılır.

Qeyd edək ki, bundan əvvəl 2024-cü ilin sentyabrında “Müqəddəs Yubiley İli” çərçivəsində tərəflər arasında Bazilikada mərmər örtüklərin və dekorativ elementlərin bərpasını nəzərdə tutan müqavilə imzalanmış və həmin işlər uğurla tamamlanmışdı.