Qəbələ və Şəki şəhərləri Azərbaycana səfər edən turistlər üçün Bakıdan sonra ən populyar istiqamətlər hesab olunur.

Realmedia.info xəbər verir ki, bu barədə Azərbaycan Turizm Bələdçiləri Assosiasiyasının İdarə Heyətinin sədri Tural Musayev məlumat verib.

Onun sözlərinə görə, hər iki şəhərin turistlər arasında populyarlığının əsas səbəblərindən biri inkişaf etmiş turizm infrastrukturu, nəqliyyat imkanlarının əlçatanlığı, hotellərin, ictimai iaşə obyektlərinin və əyləncə məkanlarının yüksək səviyyədə olmasıdır.

Tural Musayev bildirib ki, turistlər Qəbələyə əsasən Tufandağ dağ-xizək kurortunda istirahət etmək, kanat yolu ilə gəzinti etmək, Yeddi Gözəl şəlaləsini ziyarət etmək, dağ mənzərələrindən zövq almaq və Vəndam kəndinə baş çəkmək üçün gəlirlər.

Onun sözlərinə görə, Şəki isə qədim İpək Yolunun mühüm dayanacaq məntəqələrindən biri kimi zəngin tarixi irsi ilə seçilir. Şəhərdə qorunub saxlanılan karvansaralar, məscidlər, məbədlər və sənətkar dükanları turistlərin böyük marağına səbəb olur. XVIII əsrə aid Şəki Xan Sarayı və şəhərin tarixi mərkəzi YUNESKO-nun Ümumdünya İrsi Siyahısına daxil edilib.

ATGA rəhbəri qeyd edib ki, Şəki həm də məşhur paxlavası və ənənəvi piti yeməyi ilə tanınır.

Tural Musayev əlavə edib ki, hər iki şəhərdə keçirilən beynəlxalq festivallar da turist axınının artmasına mühüm təsir göstərir. Qəbələdə hər il Beynəlxalq Musiqi Festivalı və Mürəbbə Festivalı təşkil olunur. Şəkidə isə "İpək Yolu" Beynəlxalq Musiqi Festivalı keçirilir və müxtəlif ölkələrdən gələn folklor kollektivləri burada çıxış edirlər.

O, yaxın illərdə Naxçıvanın da Azərbaycanın ən cəlbedici turizm istiqamətlərindən birinə çevriləcəyini bildirib. Musayev həmçinin Quba rayonundakı Xınalıq kəndinin və İsmayıllının İvanovka kəndinin turistlər arasında böyük maraq doğurduğunu vurğulayıb.