Litvanın Baş naziri İnqa Ruqiniene Bakıya səfəri çərçivəsində UNESCO-nun Dünya İrsi Siyahısına daxil edilmiş tarixi məkanlardan biri olan İçərişəhər Dövlət Tarix-Memarlıq Qoruğu ilə tanış olub.

Səfər zamanı qonağa İçərişəhərin zəngin tarixi, qədim memarlıq nümunələri və burada aparılan genişmiqyaslı bərpa, təmir və abadlaşdırma işləri barədə ətraflı məlumat təqdim edilib. Bildirilib ki, qoruq ərazisində müxtəlif əsrlərə aid nadir tarixi abidələr qorunaraq saxlanılır və bu irs gələcək nəsillərə ötürülmək üçün dövlət tərəfindən mütəmadi şəkildə bərpa olunur.

Qeyd olunub ki, İçərişəhər təkcə Azərbaycanın deyil, bütövlükdə regionun mühüm mədəni irs mərkəzlərindən biri kimi beynəlxalq səviyyədə yüksək qiymətləndirilir.

Məlumat üçün bildirək ki, UNESCO tərəfindən Dünya İrsi Siyahısına daxil edilən İçərişəhər qədim Bakı tarixinin canlı simvolu hesab olunur.

Səfər çərçivəsində Litva nümayəndə heyəti Bakı şəhərinin tarixi-mədəni inkişafı və irsin qorunması istiqamətində görülən işləri yüksək qiymətləndirib.