Azərbaycan Prezidenti İlham Əliyev aprelin 9-da Litvanın Baş naziri İnqa Ruqiniene ilə görüşüb.

Realmedia.info xəbər verir ki, görüşdə dövlət başçısı Litvanın Baş nazirinin Azərbaycana səfərinin səmərəli olacağına və ikitərəfli əlaqələrin inkişafına töhfə verəcəyinə ümidvar olduğunu bildirib.

İnqa Ruqiniene Azərbaycanla Litva arasında uzun illərdir mövcud olan yaxşı münasibətləri vurğulayıb. Söhbət zamanı iqtisadi-ticari əlaqələrin genişləndirilməsi, enerji, investisiyalar, təhsil, kənd təsərrüfatı və digər sahələrdə əməkdaşlıq məsələləri müzakirə olunub. Həmçinin nümayəndə heyətlərinin qarşılıqlı səfərlərinin təşkili vacib sayılıb.

Litvanın Baş naziri Azərbaycanla Ermənistan arasında sülhün bərqərar olması münasibətilə dövlət başçısını təbrik edib. O, azad olunmuş ərazilərdə bərpa və quruculuq işlərini, keçmiş məcburi köçkünlərin geri qaytarılması istiqamətində görülən genişmiqyaslı işləri qeyd edib.

Prezident İlham Əliyev isə regionda sülhün təmin olunması və Azərbaycan-Ermənistan arasında ticarət əlaqələrinin qurulmasının təşəbbüskarının məhz Azərbaycan olduğunu vurğulayıb. Dövlət başçısı bildirib ki, artıq 30 minə yaxın keçmiş məcburi köçkün öz dədə-baba yurdlarına qaytarılıb.

Görüşdə işğaldan azad edilmiş ərazilərdə şəhərlərin, kəndlərin salınması, nəqliyyat və sosial infrastruktur layihələrinin icrası barədə məlumat verilib. Eyni zamanda, həmin ərazilərdə minalar probleminin bərpa işlərini ləngitdiyi bildirilib. Prezident qeyd edib ki, Vətən müharibəsindən sonra bu ərazilərdə 400-dən çox insan mina partlayışlarında həlak olub və ya yaralanıb.

Söhbət zamanı həmçinin beynəlxalq təşkilatlar çərçivəsində əməkdaşlıq və Litvanın Azərbaycanın Avropa İttifaqı ilə münasibətlərinə dəstək məsələləri, habelə regional mövzular üzrə fikir mübadiləsi aparılıb.