Realmedia.info xəbər verir ki, fevralın 11-də Azərbaycan Respublikasının Prezidenti İlham Əliyev Ərəb Parlamentinin prezidenti Məhəmməd Əhməd Əl-Yammahinin başçılıq etdiyi nümayəndə heyətini qəbul edib.

Görüşdə dövlət başçısı Azərbaycanın ərəb dünyası ilə siyasi, iqtisadi və digər sahələrdə möhkəm əlaqələrini vurğulayıb, qarşılıqlı səfərlərin münasibətlərin inkişafında əhəmiyyətini qeyd edib. Prezident İlham Əliyev həmçinin islam həmrəyliyinin gücləndirilməsinə verdiyi töhfələri və Bakıda keçirilmiş İslam Həmrəyliyi Oyunlarının əhəmiyyətini vurğulayıb.

Ərəb Parlamentinin prezidenti Azərbaycanla Ermənistan arasında sülh prosesində əldə edilmiş irəliləyişləri təbrik edib, Prezident İlham Əliyevin regionda və dünyada sülhün təmin olunmasında rolunu yüksək qiymətləndirib. O, həmçinin Fələstin məsələsində Azərbaycanın mövqeyinə görə təşəkkürünü bildirib.

Görüş zamanı işğaldan azad edilmiş ərazilərdə aparılan bərpa və quruculuq işləri, dağıdılmış mədəniyyət və dini abidələrin bərpası, eləcə də Azərbaycanla Ərəb Parlamentinin əməkdaşlıq perspektivləri müzakirə olunub.