Bakıda yol infrastrukturunun yaxşılaşdırılması istiqamətində növbəti mərhələyə start verilir.

Azərbaycan Avtomobil Yolları Dövlət Agentliyindən verilən məlumata görə, vətəndaşların rahat və təhlükəsiz hərəkətinin təmin olunması məqsədilə paytaxtın müxtəlif rayonlarında yerləşən, təmirə ehtiyacı olan küçə və prospektlərdə kompleks təmir-bərpa işlərinin həyata keçirilməsi nəzərdə tutulur.

İlkin mərhələdə Nərimanov, Yasamal, Səbail, Nəsimi, Xətai və Nizami rayonlarında yerləşən bir sıra küçə və prospektlərdə təmir işlərinə başlanılması planlaşdırılır.

Layihə çərçivəsində Xətai rayonunda Qədir Məmmədov, Abdulla Rəhimov, Kamandar Rəhimov, Sergey Senyuşkin və Rövşən Əliyev küçələri, Nizami rayonunda isə Qara Qarayev prospektinin yan yolu, Cəmşid Naxçıvanski küçəsinin 8-ci kilometr bazarı ətrafındakı hissələri, Əliağa Kürçaylı və 4-cü Köndələn küçələri təmir olunacaq.

Səbail rayonunda “Gülüstan” sarayına gedən yol, Şeyx Şamil, Bünyad Sərdarov və Əlibəyov qardaşları küçələri, Nəsimi rayonunda Abbasqulu ağa Bakıxanov, Səməd Vurğun, Füzuli və Asif Məhərrəmov küçələrində yenidənqurma işləri aparılacaq.

Nərimanov rayonunda Ceyhun Hacıbəyli küçəsinin müəyyən hissəsi və Baksol yolu, Yasamal rayonunda isə Hüseyn Cavid prospektinin müxtəlif hissələri, Ayna Sultanova, Şeyx Məhəmməd Xiyabani küçələri, eləcə də Xarici Dairəvi yolun Şamaxı istiqamətindəki yan yolunda təmir işləri həyata keçiriləcək.

Qeyd edək ki, təmir işlərinə yaxın günlərdə başlanılması planlaşdırılır. Layihənin əsas məqsədi paytaxt yollarının vəziyyətini yaxşılaşdırmaq, nəqliyyat vasitələrinin hərəkətini rahatlaşdırmaq və yol hərəkəti iştirakçılarının təhlükəsizliyini artırmaqdır.