Ukraynada davam edən müharibə fonunda ölkədə yaşayan azərbaycanlılar da raket və dron hücumlarının yaratdığı təhlükə ilə üzləşirlər. Son günlər Ukraynanın müxtəlif bölgələrində, xüsusilə paytaxt Kiyevdə baş verən hava zərbələri nəticəsində mülki ərazilərə ziyan dəyib.

Realmedia.info xəbər verir ki, Kiyevdə yaşayan azərbaycanlılar baş verən son hücumların yaratdığı gərgin vəziyyətdən danışıblar.

Kiyev sakini İlyas Talıbov bildirib ki, gecə saatlarında güclü partlayış səsləri eşidilib və hücum nəticəsində onun avtomobilinə ciddi ziyan dəyib.

“Bu mənim maşınımdır, deşik-deşik olub. Gecə saat təxminən üç idi. Birdən güclü partlayış səsi eşitdim. Birinci zərbə yaxınlıqdakı binaya düşdü, daha sonra digər istiqamətlərdə də partlayışlar oldu. Ərazidə atışma başladı. Özümü itirmişdim. Prospekt boyu benzin axırdı, maşınlardan yanacaq sızırdı. Binalardan biri yanırdı. Hamı qorxu içində idi, hər tərəfdə xaos vardı”, - deyə o qeyd edib.

Digər azərbaycanlı Elşad Şahmərdanov isə müharibə başlayandan bəri həmin ərazidə davamlı hücumların olduğunu bildirib.

Onun sözlərinə görə, raket zərbələrindən biri yaşayış binasına düşüb və həmin hadisə zamanı jurnalist qadın həyatını itirib.

“Müharibə başlayan gündən etibarən burada mütəmadi olaraq raket və uzunmənzilli dron hücumları olur. Raketlərdən biri evin içinə düşdü və orada partladı. Həmin vaxt xoşbəxtlikdən biz evdə deyildik”, - deyə E.Şahmərdanov bildirib.

Həmyerlilərimizin sözlərinə görə, davam edən hücumlar Ukraynada yaşayan dinc sakinlər üçün ciddi təhlükə yaratmaqda davam edir.