Müstəqilliyimizin Xilas TarixiHər bir xalqın tarixində onun varlığını, bu gününü və gələcəyini təyin edən çox mühüm hadisələr baş verir. Azərbaycan xalqı üçün belə taleyüklü günlərdən ən birincisi 15 İyun – Milli Qurtuluş Günüdür. Bu tarix sadəcə bir bayram deyil, Azərbaycanın müstəqil bir dövlət kimi yenidən doğulduğu gündür.1993-cü ilin iyun ayında ölkəmiz çox çətin və təhlükəli günlər yaşayırdı. Həmin vaxt Azərbaycanda böyük bir xaos, daxili çəkişmələr və idarəetmə boşluğu var idi. İqtisadiyyat çökmüş, orduda pərakəndəlik yaranmışdı. Ən qorxulusu isə ölkənin vətəndaş müharibəsi astanasında olması və müstəqilliyini tamamilə itirmək təhlükəsi idi. Belə bir çıxılmaz vəziyyətdə xalq çıxış yolunu yalnız bir nəfərdə gördü və dahi şəxsiyyət Heydər Əliyevi köməyə çağırdı.Xalqın təkidli tələbinə səs verərək Bakıya qayıdan Ulu Öndər Heydər Əliyev 15 iyunda Azərbaycan Respublikası Ali Sovetinin sədri seçildi. Məhz bu qayıdış ölkənin taleyini dəyişdi. Ümummilli Lider öz böyük dövlətçilik təcrübəsi, güclü iradəsi və uzaqgörən siyasəti ilə qısa zamanda daxili sabitliyi bərpa etdi. Qardaş qırğınının qarşısını aldı, qanunsuz silahlı qruplaşmaları ləğv etdi və dövlətin təməllərini yenidən möhkəmləndirdi. Bu qurtuluşu bizə bəxş edən, Azərbaycanı parçalanmaqdan xilas edən məhz unudulmaz rəhbərimiz Heydər Əliyev oldu.Bu gün Azərbaycanın dünyada söz sahibi olan güclü bir dövlətə çevrilməsinin, iqtisadi və siyasi uğurlarının əsasında məhz 15 iyun qurtuluşu dayanır. Ulu Öndər xalqı bir yumruq kimi öz ətrafında birləşdirərək bizə müstəqil və sabit bir vətən əmanət etdi.Nəticə olaraq deyə bilərik ki, Milli Qurtuluş Günü hər bir azərbaycanlı üçün qürur mənbəyidir. Biz bu günü qeyd edərkən dahi liderimiz Heydər Əliyevin xidmətlərini dərin ehtiramla yad edirik. Bizim borcumuz bu müstəqilliyi qorumaq və dövlətimizin daha da inkişaf etməsi üçün məsuliyyətlə çalışmaqdır.Milli Qurtuluş Günümüz mübarək!

Müəllif: Əziz İsmayılov
"Vətənə Xidmət və Hüquqi-Sosial İnkişaf Maarifləndirmə" ictimai birliyinin təmsilçisi.