FIFA 2026-cı il dünya çempionatının qrup mərhələsində Almaniya və Kürasao yığmaları arasında keçirilən oyundan əvvəl avstraliyalı VAR hakimi Şon Evansın nümayiş etdirdiyi jestlə bağlı araşdırmaya başlayıb.

Realmedia.info xəbər verir ki, hadisə iyunun 14-də baş tutan və Almaniya millisinin 7:1 hesablı qələbəsi ilə yekunlaşan qarşılaşmadan əvvəl canlı yayım zamanı qeydə alınıb. VAR otağından yayımlanan görüntülərdə Şon Evansın neonasist və irqçi qruplarla əlaqələndirilən tərsinə çevrilmiş “OK” işarəsinə bənzər jest göstərdiyi iddia olunub.

Məsələ sosial şəbəkələrdə geniş rezonans doğurub və bir sıra anti-diskriminasiya təşkilatları FIFA-nı hadisəni araşdırmağa çağırıblar. Bundan sonra qurumun intizam orqanları məsələ ilə bağlı araşdırmaya başlayıb.

Şon Evans isə jestin qəsdən edilmədiyini bildirib. Hakimin sözlərinə görə, həmin hərəkət adi əl jesti olub və heç bir siyasi, ideoloji və ya irqçi məna daşımayıb.

FIFA tərəfindən aparılan araşdırmanın nəticələrinin yaxın günlərdə açıqlanacağı gözlənilir. Qurum hadisənin bütün təfərrüatlarını araşdırdıqdan sonra yekun qərarını verəcək.